മാതൃകാ ദുരിതാശ്വാസ പ്രവർത്തനങ്ങളുമായി എളയടം ബി.വി.എൽ.പി സ്കൂൾ വിദ്യാർത്ഥികൾ

എളയടം: നാടിനെ നടുക്കിയ മഹാ പ്രളയത്തിന്റെ ഓർമ്മയിൽ ദുരിത ബാധിതരെ സഹായിക്കാനായി വേറിട്ട പ്രവർത്തനങ്ങളിലൂടെ മുഖ്യമന്ത്രിയുടെ ദുരിതാശ്വാസ നിധിയിലേക്ക് ഫണ്ട് സമാഹരിച്ച് മാതൃകയാവുകയാണ് എളയടം ബി.വി.എൽ.പി സ്കൂളിലെ കുരുന്നുകൾ.
'നാടിന്റെ ഉയർച്ചയ്ക്ക് അഭിമാനത്തോടെ ഞങ്ങളും എന്ന ശീർഷകത്തിൽ പ്ലക്കാർഡുകളും, പ്രളയ ചിത്രങ്ങളും വാർത്തകളും അടങ്ങിയ കൊളാഷുകളും തയ്യാറാക്കി വിവിധ കലാപരിപാടികളുമായി പ്രദേശത്തെ വീടുകളിൽ നിന്നും, സർക്കാരിന്റെ നിർദേശപ്രകാരം ഓണാഘോഷ പരിപാടികളിൽ പെട്ടിവെച്ചും, കുഞ്ഞുമക്കളുടെ കോക്കുടുക്കയിലെ നാണയത്തുട്ട് സമ്പാദ്യവുമെല്ലാം ഉൾപ്പെടുത്തി *പതിനായിരത്തി ഇരുനൂറ്റി നാൽപത്* രൂ‌പയാണ് കുഞ്ഞു കരങ്ങൾ ദുരിതാശ്വാസ നിധിയിലേക്ക് സമാഹരിച്ചത്.. വിദ്യാലയത്തിൽ നടന്ന ചടങ്ങിൽ വെച്ച് ഹെഡ്മാസ്റ്റർ ടി.കെ നൗഫൽ പുറമേരി പഞ്ചായത്ത് പ്രസിഡണ്ട് കെ.അച്ചുതന് ഫണ്ട് കൈമാറി ദുരിതാശ്വാസ നിധിയിൽ നിക്ഷേപിച്ചു.വാർഡ് മെമ്പർ ആർ അബ്ദുസ്സലാം അധ്യക്ഷത വഹിച്ചു.മാനേജർ പൈകാട്ട് അമ്മദ് മാസ്റ്റർ, കെ.ടി.കെ ബാലകൃഷ്ണൻ, നീലഞ്ചേരിക്കണ്ടി കുഞ്ഞബ്ദുല്ല,സി.കെ അബ്ദുല്ല, പി.പി ഭാസ്കരൻ,കെ.കെ വിലാസിനി, ടി.പി ഷരീഫ സംസാരിച്ചു. പി.ടി.എ പ്രസിഡണ്ട് പി.കെ പ്രദീപൻ, സ്റ്റാഫ് സെക്രട്ടറി യൂനുസ് മുളിവയൽ, വി.എം ബിജേഷ്, ഷഹീർ പൈകാട്ട് ദുരിതാശ്വാസ പ്രവർത്തനത്തിന് നേതൃത്വം നൽകി.

"ജോസേട്ടന് ഇനി കിടന്നുറങ്ങാം.. പേടി കൂടാതെ " കൈത്താങ്ങായി വാട്സ്ആപ് കൂട്ടായ്മ
വാണിമേൽ: ആരോരുമില്ലാതെ ഒരു ചെറിയ ടാർപോളിൻ ഷെഡിൽ താമസിച്ചു വരികയായിരുന്ന ജോസ് എന്ന വയോധികന് സ്വന്തമായി വീട് വാങ്ങി നൽകി മാതൃകയായിരിക്കുകയാണ് വാണിമേൽ 'മാനവീയം' വാട്സ്ആപ് കൂട്ടായ്മ. പുതുക്കയം മുതൽ പച്ചപ്പാലം വരെയുള്ള ഒരു കൂട്ടം നല്ല മനസ്സുകളാണ് ഈ കൂട്ടായ്മയിലൂടെ വയോധികന് കൈത്താങ്ങായത്. 'മാനവീയം സ്നേഹവീട് ' എന്ന പേരിൽ നൽകിയ വീടിന്റെ താക്കോൽദാനം വാർഡ് മെമ്പർ എൻ.പി.വാസു നിർവ്വഹിച്ചു.

ഇന്ന് തിരുവോണം ; സഹജീവികളുടെ നോവറിയാൻ ശരണാലയത്തിൽ അവരെത്തി

നാദാപുരം : ജീവിതത്തിൽ ഒറ്റപ്പെട്ട് പോയ ഒരു കൂട്ടം സഹജീവികളുടെ നോവും നൊമ്പരവും നേരിട്ടറിയാൻ ഓണാശംസകളുമായി കുട്ടിപ്പൊലിസ് സംഘം തണൽ ശരണാലയത്തിലെത്തി.
ഉമ്മത്തൂർ എസ്.ഐ ഹയർ സെക്കണ്ടറിയിലെ സ്റ്റുഡന്റ് പൊലിസ് കാഡറ്റ് അംഗങ്ങളാണ് ജീവിത സായാഹ്നത്തിൽ ഒറ്റപെട്ട് കഴിയുന്ന ഇരുനൂറ്റി മുപ്പതോളം അന്തേവാസികൾക്ക് ഐക്യദാർഢ്യം പങ്കിടാനെത്തിയത്. കുശലം പറഞ്ഞും തമാശ പങ്കിട്ടും ഓണം ആശംസകൾ നേർന്നും മണിക്കൂറുകളോളം കാഡറ്റുകൾ ഇവർക്കൊപ്പം ചെലവഴിച്ചു. ഇവിടെയുള്ള അപ്പൂപ്പന്മാരും അമ്മൂമന്മാരും പേരമക്കൾ അടുത്തെത്തിയ പ്രതീതിയിൽ വേദനകൾ മറന്ന് പാട്ട് പാടാനും നൃത്തം ചെയ്യാനും കുട്ടികൾക്കൊപ്പം ചേർന്നു. മണിക്കൂറുകളോളം അന്തേവാസികൾകൊപ്പം ചെലവഴിച്ച ഇവർ ഭാവിയിൽ ഇത് പോലെയുള്ള അഗതിമന്ദിരങ്ങൾ ഉയർന്ന് വരാനുള്ള സാഹചര്യം ഇല്ലാതാകട്ടെയെന്ന പ്രാർഥനയോടെ നിറകണ്ണുമായാണ് മടങ്ങിയത്. ഓണാവധിക്കാല ക്യാമ്പിന്റെ ഭാഗമായി സംഘടിപ്പിച്ച ഈ സന്ദർശനത്തിന് കമ്യൂണിറ്റി പൊലിസ് ഓഫീസർമാരായ പി.പി അബ്ദുൽ ഹമീദ് , കെ രഞ്ജിനി , സിവിൽ പൊലിസ് ഓഫീസർമാരായ എം അനീ വൻ , കെ ഷജിന നേതൃത്വം നൽകി.